మోగ్లీ అన్ని వర్గాల ఆడియెన్స్‌ను ఆకట్టుకునేలా ఉంటుంది – సందీప్ రాజ్
జాతీయ అవార్డు గ్రహీత సందీప్ రాజ్ దర్శకత్వంలో రోషన్ కనకాల నటిస్తున్న చిత్రం ‘మోగ్లీ’. పీపుల్స్ మీడియా ఫ్యాక్టరీ బ్యానర్ మీద ఈ మూవీని టీజీ విశ్వ ప్రసాద్, కృతి ప్రసాద్ సంయుక్తంగా నిర్మిస్తున్నారు. ఈ సినిమా డిసెంబర్ 12న రిలీజ్ కాబోతోంది. ఈ క్రమంలో చిత్ర దర్శకుడు సందీప్ రాజ్ మీడియాతో ముచ్చటించారు. సినిమా గురించి ఆయన చెప్పిన విశేషాలివే..
ప్రస్తుతం మీరు నటుడిగా ఎక్కువ కనిపిస్తున్నారు? మీకు డైరెక్షన్, యాక్టింగ్‌లో ఏదంటే ఎక్కువ ఇంట్రెస్ట్?
నాకు ముందుగా నటన అంటేనే ఇష్టం. ‘చాయ్ బిస్కెట్’లో ఉన్నప్పుడు కథలు కూడా రాసేవాడ్ని. అలా ‘అతిథి’ అనే షార్ట్ ఫిల్మ్ చేశాను. ఆ తరువాత దర్శకుడిగా నాకు అవకాశాలు స్టార్ట్ అయ్యాయి. అడ్వాన్స్‌లు కూడా ఇచ్చేందుకు రెడీ అయ్యారు. ఆ తరువాత మెల్లిమెల్లిగా కథలు రాయడం, డైరెక్షన్ మీద ఫోకస్ పెట్టాను. కానీ నాలోని యాక్టింగ్ కోరికల్ని ఇప్పుడిప్పుడే తీర్చుకుంటున్నాను.
ఐదేళ్ల తరువాత దర్శకుడిగా వస్తున్నారు.. ఎలాంటి జాగ్రత్తలు తీసుకున్నారు?
‘మోగ్లీ’ ప్రస్తుత ట్రెండ్‌కి తగ్గట్టుగా ఉంటుంది. ఈ కథలో నేను మాత్రం నటించలేదు. ఐదేళ్ల గ్యాప్ తరువాత దర్శకుడిగా సినిమా చేస్తున్నాను. అందుకే ఒళ్లు దగ్గర పెట్టుకుని మరింత జాగ్రత్తగా చేశాను.
‘మోగ్లీ’లో కథ, పాత్రలు ఎలా ఉండబోతోన్నాయి?
డెఫ్ అండ్ డంబ్ పాత్రను పోషించడం అంత సులభం కాదు. ప్రేమకు భాష అవసరం లేదు అనే విషయాన్ని చెప్పేందుకు ఆ పాత్రను అలా డిజైన్ చేశాను. ఇందులో హీరో, హీరోయిన్ పాత్రలు చూసి అందరూ కనెక్ట్ అవుతారు. హీరో ఎంత అమాయకుడు అయితే అంత స్ట్రాంగ్‌గా కనిపిస్తాడు అన్నది నా అభిప్రాయం.
జంగ్లీ బుక్‌లోని మోగ్లీకి ఈ మోగ్లీకి ఎలాంటి సంబంధం ఉంటుంది?
మీకు ఇంత వరకు తెలిసిన మోగ్లీ కథలకు ఈ కథకు ఎలాంటి సంబంధం ఉండదు. ఫస్ట్ హాఫ్ అంతా చాలా ఫన్నీగా ఉంటుంది. ఆద్యంతం నవ్వించేలా సాగుతుంది. అందరినీ ఎంటర్టైన్ చేసేలానే మూవీని రూపొందించాను.
మోగ్లీలో బండి సరోజ్ గారి పాత్ర గురించి చెప్పండి?
నాకు విలన్ పాత్రలంటేనే చాలా ఇష్టం. నటుడిగా అయినా దర్శకుడిగా అయినా కూడా విలన్ పాత్రలపైనే ఎక్కువగా ఫోకస్ పెడతాను. ఈ చిత్రంలో బండి సరోజ్ గారి పాత్రను చూసి అంతా షాక్ అవుతారు. గత కొన్నేళ్లుగా తెలుగులో ఇలాంటి విలన్ పాత్రను మాత్రం కచ్చితంగా చూసి ఉండరు. ‘సూర్యాస్తమయం’లో బండి సరోజ్ గారిని చూసి ఈ పాత్రకు సెట్ అవుతారని తీసుకున్నాను.
‘మోగ్లీ’ టైటిల్ జనాల్లోకి వెళ్లిందని భావిస్తున్నారా?
ప్రజెంట్ ట్రెండ్‌కి మోగ్లీ అంటే ఎవరో తెలీదు. నాకు టైటిల్స్ పెట్టడం అంటే చాలా ఇష్టం. నా టైటిల్స్ అందరికీ అర్థం అవ్వాలని అనుకుంటా. అందుకే ‘కలర్ ఫోటో’ అని సింపుల్ టైటిల్ పెట్టాం. కానీ ‘మోగ్లీ’ మాత్రం ఇప్పటి తరానికి సరిగ్గా అర్థం కావడం లేదు.
‘మోగ్లీ’ క్యాస్టింగ్ గురించి చెప్పండి?
ఓ కథకు క్యాస్టింగ్ పర్ఫెక్ట్‌గా సెట్ అయితే సగం పని అయిపోయినట్టే. ‘మోగ్లీ’లో అద్భుతమైన టీం సెట్ అయింది. డేట్స్ క్లాష్ అవ్వడం వల్ల ఈ సినిమాలో సంపూర్ణేశ్ బాబు ఓ పాత్రను చేయలేకపోయారు.
‘మోగ్లీ’ని అనుకున్న బడ్జెట్‌లోనే తీశారా?
నేను కథ కంటే స్క్రీన్ ప్లేని నమ్ముతాను. కథను కాపీ కొట్టగలరేమో గానీ స్క్రీన్ ప్లేని మాత్రం కాపీ కొట్టలేరు. కోటినర్నలో చేసిన ‘కలర్ ఫోటో’ అద్భుతం చేసింది. నాకు ఇచ్చిన బడ్జెట్‌లోనే ఎంత గొప్పగా తీయగలను అన్నది చూసుకుంటాను. ‘మోగ్లీ’ని అనుకున్న బడ్జెట్‌లో అద్భుతంగా తీశానని అనుకుంటున్నాను. ఉన్న పేరుని చెడగొట్టుకోవద్దని ఒళ్లు దగ్గర పెట్టుకుని ఈ మూవీని తీశాను.
‘మోగ్లీ’ కోసం రోషన్‌ను ఎందుకు తీసుకున్నారు? ఈ పాత్ర కోసం ఆయన పడిన కష్టం ఏంటి?
కథ రాసుకున్న తరువాత రోషన్‌ను అనుకున్నాను. ‘బబుల్‌గమ్’లొ రోషన్ గెటప్, రా నెస్ ఇవన్నీ చూసి ‘మోగ్లీ’కి సెట్ అవుతాడని ఫిక్స్ అయ్యాను. 21 ఏళ్లకే ఆ కాన్ఫిడెన్స్, యాక్టింగ్ ఏంటి? అని షాక్ అయ్యాను. రోషన్ తన పాత్రను అద్భుతంగా పోషించాడు. ఈ మూవీ కోసం రోషన్ శారీరకంగానూ చాలా కష్టపడ్డాడు.
ప్రమోషన్స్‌లో రామ్ చరణ్ గారు, ఎన్టీఆర్ గారితో ఏర్పడిన ఎక్స్‌పీరియెన్స్ ఏంటి?
రామ్ చరణ్ గారి ‘ధృవ’ ప్రమోషన్స్ టైంలో మా టీం తరుపున ఆయన్ను కలిశాను. మళ్లీ ‘మోగ్లీ’ గ్లింప్స్ ప్రమోషన్స్ కోసం కలిశాను. ఆనాటి విషయాల్ని కూడా ఆయన గుర్తు పెట్టుకుని నన్ను ప్రశంసించారు. నెక్ట్స్ ఏదైనా కథ ఉంటే చెప్పు అని కూడా రామ్ చరణ్ గారు అన్నారు. ఎన్టీఆర్ గారు మా టీంలో జోష్‌ని నింపారు. ఆయన ఎనర్జీని చూసి అందరూ షాక్ అయ్యారు.
‘మోగ్లీ’ అవుట్ పుట్‌పై నిర్మాత సంతృప్తికరంగా ఉన్నారా?
‘మోగ్లీ’లో ఐదు పాటలుంటాయి. అన్ని రకాల అంశాల్ని చూపించేలా పాటల్ని తెరకెక్కించాం. మొదటి రోజు షూటింగ్‌లో చాలా రూల్స్‌ని పాటించాం. ఇంతలోనే చేయాలి.. అంతలోనే తీయాలని అన్నారు. కానీ ఫస్ట్ షెడ్యూల్ అయిన తరువాత అవుట్ పుట్ చూసి మాకు ఫ్రీడం ఇచ్చారు. ‘మోగ్లీ’ అవుట్ పుట్ చూసి విశ్వ ప్రసాద్ గారు చాలా సంతృప్తికరంగా ఫీల్ అయ్యారు.
‘మోగ్లీ’కి టీజీ విశ్వ ప్రసాద్ గారి సహకారం గురించి చెప్పండి?
పీపుల్స్ మీడియా ఫ్యాక్టరీలో ప్రస్తుతం భారీ బడ్జెట్ చిత్రాలు వస్తున్నాయి. పెద్ద సినిమాల్ని చేస్తున్న టైంలో కూడా టీజీ విశ్వ ప్రసాద్ గారు మాకు అన్ని రకాలుగా సపోర్ట్ చేశారు.
‘మోగ్లీ’కి ఆడియెన్స్ ఏం ఆశించి థియేటర్‌కు రావాలి? ఈ చిత్రం ఎవరిని టార్గెట్ చేస్తుంది?
‘మోగ్లీ’ అన్ని వర్గాల ఆడియెన్స్‌ను ఆకట్టుకునేలా ఉంటుంది. యూత్, ఫ్యామిలీ, మాస్ అని ఇలా వేర్వేరుగా కాకుండా అందరినీ మెప్పిస్తుంది. ఇందులోని సందేశాన్ని మాత్రం ఇప్పుడే రివీల్ చేయలేను. మా సినిమాకు అదే పెద్ద ట్విస్ట్. చివర్లో అద్భుతమైన ఎక్స్‌పీరియెన్స్‌ని ఫీల్ అవుతారు. అన్ని రకాల ఎమోషన్స్‌ను చూపిస్తూనే ఈ మూవీ ఎంగేజింగ్‌గా ఉంటుంది. చివరకు మాత్రం ఓ బలమైన ఫిలాసఫీని చూపిస్తాను.
మధ్యలో మీరు అనుకున్న ప్రాజెక్ట్ కాకుండా ‘మోగ్లీ’ కథను రాసుకున్నారు. మరి మీ డ్రీమ్ ప్రాజెక్ట్ అసలు ఉంటుందా?
‘కలర్ ఫోటో’ తరువాత నేను స్టార్ హీరోతో సినిమాని చేయాలని అనుకున్నాను. కానీ డేట్స్ మాత్రం సర్దుబాటు కాలేకపోతోన్నాయి. అలా గత ఏడాది వరకు వెయిట్ చేశాను. ఆ గ్యాప్‌లోనే ఈ ‘మోగ్లీ’ కథను రాసుకున్నాను. నేను అనుకున్న స్టార్‌తోనే ఆ మూవీని కచ్చితంగా చేస్తాను. అది నా డ్రీమ్ ప్రాజెక్ట్.
నటుడిగా, దర్శకుడిగా మీ అప్ కమింగ్ ప్రాజెక్ట్‌ల గురించి చెప్పండి?
ప్రస్తుతం నటుడిగా రెండు ప్రాజెక్ట్‌లు చేస్తున్నాను. డిసెంబర్ 20 నుంచి నటుడిగా బిజీ అవుతాను. నాకు మాత్రం ఓ ఫ్యాంటసీ కథను చేయాలని ఉంది. ఈ మూవీ రిజల్ట్ తరువాత ఏ జానర్ కథను చేయాలా? అన్నది ఆలోచిస్తాను.
